WILLEMSTAD. – Direktiva di Global Entrepreneurship Week Curaçao ya ta den ‘full’ preparashon pa e di 10 aña konsekutivo ku ta selebrá GEW na Kòrsou. E organisashon mama, Global Entrepreneurship Network, na kua tin mas di 200 pais afiliá, e aña aki a skohe e siman di 11 pa 17 di novèmber pa selebrashon di ‘entrepreneurship’. Ophetivo di GEW ta pa tira un lus spesial riba importansia di e emprendedó pa krea ideanan di negoshi.
Pa medio di seshonnan di informativo, manera charla, tayernan di trabou, plataformanan pa amplia ret di konekshon (networking events), debatenan, etc., e ‘siman empresarial’ ta aportá na desaroyo di e emprendedó i su empresa(nan). Global Entrepreneurship Week durante di nuebe aña konsekutivo a ser selebrá na Kòrsou i pa di 9 aña tambe na isla ruman Boneiru. Pa algun aña a tene aktividatnan di GEW tambe na Sint Maarten, Saba, i Sint Eustatius den kolaborashon ku un organisashon partner na Isla Ariba.
E aña aki ta formalizando kontaktonan ku un organisashon na Aruba tambe pa tene GEW na Aruba. “Nos ta wak bèk ku hopi satisfakshon ku mas i mas organisashon i empresanan a bin ta uni i tene nan eventonan bou di e paraplü di Global Entrepreneurship Week,” sra. Elgenia Pieternella, presidente di GEW pa Dutch Caribbean, a bisa. “E kresementu di partnernan i eventonan a pone ku nos mester a pidi e organisashon mama pèrmit pa nos ekstendé e aktividatnan pa mas ku 1 siman i últimamente nos a amplia asta pa mas ku 1 luna, ku ‘On the Road to GEW events’ i tambe ‘Post GEW events’,” sra. Pieternella a sigui bisa.
“Un biaha mas nos ke yama danki na tur partner ku a mira e importansia di uni forsa i esfuersonan pa desaroyá mundu empresarial na nos islanan. Kada empresa ta pèrkurá pa desaroyo di nos rekurso humano, e talentonan di nos pueblonan, krea kupo di trabou i aportá na ekonomia di nos islanan en general. Nos ta yama danki na kada organisashon partner pa e konfiansa, nan aporte, i den mes rosea invitá organisashonnan ku ke bira parti di e famia di GEW pa tene nan evento, pa tuma kontakto ku nos via E-mail board@gewcuracao.com òf manda nos un app pa nos interkambiá di idea.”
Pa 2024 e direktiva di GEW Curaçao un biaha mas ta trahando riba ideanan inovativo pa asina e selebrashon di 10 aña GEW Curaçao lo ta unu spesial. “Ya nos por hasi menshon di entre otro ku nos lo bai realisá un ‘Business Hall of Fame’, un ‘Business Legacy Award event’, i un Business Pitch Competetion ku mester saka representantenan di nos region pa partisipá na e Global Pitch Competition,” sra. Pieternella a informá. “Dentro di poko nos lo anunsiá e oradornan spesial ku nos lo invitá, detaye di e eventonan menshoná i tambe informá di otro aktividatnan ku por spera pa 2024.”
“Nos ta invitá tur siguidó di GEW i mundu empresarial pa sigui medionan di komunikashon pa keda al tanto di informashon ku nos kompartí na su debido tempu. Nos ta klousurá yamando danki na tur organisashon i persona ku, di un forma òf otro, a aportá na kresementu di GEW Curaçao i GEW Bonaire.”
