WILLEMSTAD — Resientemente, Fundashon Negoshi Pikiña a organisá ‘Global Entrepreneurship Week Curaçao (GEW)’ ku e meta pa stimulá desaroyo empresarial den nos komunidat i inspirá prospekto empresarionan pa tuma e promé paso pa habri nan propio empresa, di manera ku nan tambe por aportá na ekonomia di Kòrsou. Den kuadro di e patrosinio na GEW, Banco di Caribe a presensiá e evento ‘Developments and Opportunities in Sustainable Energy’ ku a ser organisá na Universidat di Kòrsou (UoC).
Studiantenan di BEST, Bachelor in Engineering & Sustainable Technology, a kolaborá ku Fundashon Negoshi Pikiña pa trese kompanianan, studiantenan, i prospekto studiantenan di UoC huntu, pa kompartí nan interes den e futuro di sostenibilidat, e desaroyonan riba e área aki i e oportunidatnan ku por kondusí na un kresementu di ekonomia di Kòrsou. Rèktòr di Universidat di Kòrsou, sr. Francis Delanoy, a splika ku ta importante pa eduká i konsientisá futuro generashonnan di posibilidatnan i teknologia riba e área di sostenibilidat.
Vários kompania ta implementando inisiativanan ambiental pa duna un aporte pa minimalisá e efektonan negativo riba nos sistema ekológiko òf pa sostené preservashon di nos planeta i naturalesa. Dynaf, MEO, i Korpodeko ta algun di e kompanianan ku ta enkourashá sostenibilidat i ku tambe a hasi un presentashon durante e evento. AMP Motors tambe a presentá nan outonan elektróniko na e studiantenan.
BdC su kompromiso ku Sostenibilidat Ambiental. Pa algun aña kaba, Banco di Caribe ta komprometé na sostenibilidat mediante outonan di kompania elektróniko i pènel solar riba tur su edifisionan, digitalisashon di prosesonan, i den forma di ‘Green Loans’ pa yuda kompania- i klientenan realisá un futuro mas sostenibel.
Pues, un evento manera esun di ‘Developments and Opportunities in Sustainable Energy’, Banco di Caribe ta sostené sigur. Ta importante pa sigui konsientisá nos komunidat i nos hóbennan ku tin e potensial di bira empresario òf profeshonal den e industria di ‘Environmental Sustainability’. Banco di Caribe ta aploudí Fundashon Negoshi Pikiña pa e diferente seminarionan i ‘workshops’ ku nan a ofresé durante di GEW pa stimulá empresarionan i amplia nan vishon pa mira posibilidatnan sostenibel pa nan empresa i pa Kòrsou.
